لە چوارچێوەی هەڵمەتە مرۆییە بەردەوامەکانیدا، ڕێکخراوی ڕۆشنبیریی کورد – بەریتانیا دەستی میهرەبانی و پاڵپشتی بۆ نەخۆشانی دەروونی درێژ دەکات. لە چالاکییەکی مرۆڤدۆستانەدا کە لە ڕۆژی یەکشەممە، ڕێکەوتی ٠٥ / ٠٤ / ٢٠٢٦ بەڕێوەچوو، ڕێکخراوەکەمان هەستا بە سازکردنی ئاهەنگێکی دڵخۆشکەر و پێشکەشکردنی نیوەڕۆخوانێک بۆ پەپوولەکانی نەخۆشخانەی سۆزی دەروونی.
ئەم هەنگاوە گوزارشت لە پەیامی ڕەسەنی ڕێکخراو دەکات کە برێتییە لە خزمەتکردنی ئەو توێژە تایبەتانەی کۆمەڵگا کە پێویستیان بە ئاوڕلێدانەوە و هاوکاری هەیە. ڕێکخراوی ڕۆشنبیریی کورد جارێکی تر جەختی لەوە کردەوە کە کاری خۆبەخشی دەتوانێت کاریگەرییەکی ئەرێنی گەورە لەسەر دەروونی کەسانی پێویستدار دروست بکات و ببێتە هۆکارێک بۆ بەهێزکردنی بنەماکانی مرۆڤایەتی لە کۆمەڵگەدا.
هیوادارین ئەم جۆرە دەستپێشخەرییانە ببنە هاندەر و سەرچاوەی ئیلهام بۆ ڕێکخراوەکانی تر، تا هەمووان پێکەوە بەشدار بین لە دروستکردنی داهاتوویەکی گەشتر بۆ ئەو کەسانەی پێویستیان بە پاڵپشتی و هاوکاریی ئێمەیە.
