بەپێی هەواڵێک کە لە ڕۆژنامەی “دەیلی مەیلی”ی بەریتانی بڵاوکراوەتەوە، فەرمانبەرێکی وەزارەتی ناوخۆی بەریتانیا (Home Office) ڕووبەڕووی تۆمەتی ئەوە بووەتەوە کە لە بەرامبەر وەرگرتنی پارەدا، داواکارییەکانی مافی پەنابەریی پەسەند کردووە.
لێکۆڵینەوەکان دەستیانپێکردووە بۆ دڵنیابوونەوە لە ڕاستی و دروستی ئەم تۆمەتانە. گومان دەکرێت ئەم کارمەندە پێگەی خۆی بۆ بەرژەوەندیی تایبەتی بەکارهێنابێت و بە شێوەیەکی نایاسایی کاری لەسەر دۆسیەی پەناخوازان کردبێت.
وردەکاریی زیاتر لەبارەی چۆنیەتی ئەنجامدانی ئەم کارە.
کارمەندێکی وەزارەتی ناوخۆی بەریتانیا کە پەیوەندی بە پەناخوازانەوە دەکرد و پێشنیاری پێدانی مافی پەنابەریی بەریتانیای بۆ دەکردن لە بەرامبەر پارەدا، سزای زیندانی بەسەردا سەپێنرا.
عیمران مولا، تەمەن ٣٩ ساڵ، کە ئەمڕۆ بۆ یەکەمجار وێنەکەی لەلایەن ماڵپەڕی مەیڵ ئۆنڵاینەوە بڵاوکرایەوە، دوای ئەوەی سزای چوار ساڵ و نیو زیندانی بەسەردا سەپێنرا بەهۆی وەرگرتنی ٣٥٠٠ پاوەند بەرتیل لە پیاوێکی بەنگلادیشی.
مولا، کە خەڵکی شاری بلاکبێرنە لە پارێزگای لانکاشایەر، پەیوەندی تەلەفۆنی بەو پەناخوازانەوە دەکرد کە ئەگەری زۆری ڕەتکردنەوەی داواکارییەکانیان هەبوو و پێی دەوتن کە دەتوانێت یارمەتیان بدات بۆ هەڵوەشاندنەوەی بڕیاری ڕەتکردنەوەکانیان لە بەرامبەر وەرگرتنی پارەی نەختینەدا.
ئەم فەرمانبەرە، کە لە نووسینگەی وەزارەتی ناوخۆ لە مانچستەر کاری دەکرد، بەردەوام بوو لە وەرگرتنی پارە لە یەکێک لە پەناخوازان تەنانەت کاتێک لەژێر لێکۆڵینەوەی سەرپەرشتیارەکانیدا بوو.
ناوبراو لە دادگای تاوانەکانی پرێستن دانی بە تاوانەکانی پەیوەست بە کۆچ و بەرتیلدا ناوە، دوای ئەوەی یاری بە سیستەمەکە کردبوو بۆ هەڵوەشاندنەوەی داواکارییەکی پەنابەریی ڕەتکراوە.
پیاوێکی دیکە، نورال ئەمین بێغ، تەمەن ٢٣ ساڵ، سزای ١٨ مانگ زیندانی بەسەردا سەپێنرا، بە تۆمەتی بەرتیلدان دوای ئەوەی پارەی دابوو بە مولا بۆ ئەوەی داواکاریی پەنابەرییەکەی بۆ پەسەند بکات.
فرانسس کیلین، داواکاری گشتی باڵا لە دەزگای داواکاری گشتیی باکووری ڕۆژئاوا، وتی: “عیمران مولا لە پێگەیەکی متمانەپێکراودا بوو لە تیمی پەنابەری لە وەزارەتی ناوخۆ. ئەو ئەم متمانەیەی بۆ پڕکردنی گیرفانی خۆی بەکارهێنا بە پێشنیارکردنی گۆڕینی دەرەنجامی داواکارییەکانی پەنابەری لە بەرامبەر پارەدا.”
مولا وەک کارمەندی جێبەجێکار لە تیمی پەنابەری لە مانچستەر کاری دەکرد.
ناوبراو هەموو ڕاهێنانەکانی تەواو کردبوو، لەوانەش خولەکانی تایبەت بە ئاسایش و پاراستنی داتا و دژە ساختەکاری، بەرتیل و گەندەڵی. ئەو سەرپەرشتی دۆسیە دیجیتاڵییەکانی دەکرد و چاوپێکەوتنی لەگەڵ پەناخوازاندا دەکرد و داواکارییەکانیانی تاوتوێ دەکرد.
بێغ هاوڵاتییەکی بیانی خەڵکی بەنگلادیشە و لە ١٥/٢/٢٠٢٤ داواکاریی پەنابەرییەکەی ڕەتکرایەوە. لە ڕێگەی نامەیەکەوە ئاگادارکرایەوە و ڕێنمایی کرا سەبارەت بە سیاسەتی تانەگرتن.
ڕۆژی دواتر، مولا پەیوەندی پێوەکرد، کە زانیارییەکانی لە سیستەمەکانی وەزارەتی ناوخۆوە بەدەستهێنابوو.
دوای شەش ڕۆژ، بێغ بڕی ١٥٠٠ پاوەندی بۆ هەژماری مولا گواستەوە. ئەو دووانە لە چەند ڕۆژی دواتردا چەند جارێک پەیوەندییان بەیەکەوە کرد.
لە ١٣/٣/٢٠٢٤، مولا سیاسەتی پێشێل کرد بۆ ئەوەی دۆسیەی بێغ بۆ خۆی تەرخان بکات و داواکاریی پەنابەرییەکەی پەسەند کرد.
بێغ لە ماوەی چەند مانگی داهاتوودا پارەی زیاتری گواستەوە کە کۆی گشتی گەیشتە ٣٥٠٠ پاوەند.
هەر لەو ماوەیەدا، پەیوەندی بە دووەم ئامانجی خۆیەوە کرد، کە هاوڵاتییەکی تورک بوو و چاوەڕێی بیستنی ئەوە بوو کە ئایا داواکاریی پەنابەرییەکەی پەسەند کراوە یان نا.
مولا تەلەفۆنی بۆ هاوڵاتییە تورکەکە کرد، بە ناوێکی ساختەوە، و بە پیاوەکەی وت کە ئەگەری زۆرە داواکارییەکەی ڕەتبکرێتەوە بەڵام دەتوانێت یارمەتی بدات ئەگەر ٢٠٠٠ پاوەندی پێبدات.
پێی وت کە دواتر تەلەفۆنی بۆ دەکاتەوە.
پیاوەکە نیگەران بوو لە تەلەفۆنەکە بۆیە بە پارێزەری کۆچەکەی ڕاگەیاند و مولا لە مانگی ئازاری ٢٠٢٤دا دەستگیرکرا. لە کاتی لێکۆڵینەوەکانی پۆلیسدا هیچ لێدوانێکی نەدا.
لەکاتێکدا لەژێر لێکۆڵینەوەدا بوو، مولا بەردەوام بوو لە وەرگرتنی پارە لە بێغ.
مولا لە ١٢/٣/٢٠٢٥، لە دادگای تاوانەکانی پرێستن، دانی بە پیلانگێڕی بۆ یارمەتیدانی کۆچی نایاسایی، دەستگەیشتنی بێ مۆڵەت بە زانیاریی کۆمپیوتەری و سێ تۆمەتی بەرتیلدا نا.
بێغ لە ٩/٦/٢٠٢٥، پێش دەستپێکردنی دادگاییکردنەکەی لە دادگای تاوانەکانی پرێستن، دانی بە پیلانگێڕی بۆ یارمەتیدانی کۆچی نایاسایی و دوو تۆمەتی بەرتیلدا نا.
ئامادەکردنی: ئاراس بڵباس
